تميت عشرين

**Admin** · **Admin** السبت يونيو 19, 2021 2:57 am

- تّميت عشرين ؟
= لِسة شوية
- عَديت سبعين ؟؟
= من وقت كبير
- ا حلامك فين ؟
= طارت على فوق
- طب و الوِحدة ؟
= اخدتني أسير
- عَندك أصحاب ؟
= بتعد لكام ؟
- اصحاب اصحاب !
= يبقى ماعنديش
- فضفض طيّب ..
= ملهوش داعي
- انا قلبي يساع ..
= دة كلام تهويش
- لو مش راح تحكي ف سببك ايه ؟
= المعّلشات بدأت بـ " مفيش "
- بتحب الليل ؟
= اسأل سوما
- بتخاف مـ الجاي ؟
= اصبحت بخاف
- أهلك أصحاب ؟
= مش بـ استمرار
- طب بينكم اية ؟
= حاجز شفّاف
- حَبيت بصحيح ؟
= حَبيت جدا
- و دليلك اية ؟
= الفجر إدّن
- صَليت و دعيت ؟
= و بكيت اوقات
- و الناتج اية ؟
= بـِعدت عَني ..
- خِلصت بجروح ؟
= بالنسبالي
- بـ النسبالها ؟
= كات بتغنّي
- مَضروب بـرصاص ؟
= عينها طبنجة
- جَرحك مَعسول ؟!
= زَي المانجة
- تركتلك اية ؟
= وحدة و غُربة
- سابت عنوان ..
= هي " الكوربة "
- بتعدي هناك ؟
= قبل اما بنام
- طب و انت تمام ؟
= انا حِلو .. جَميل
- فاكر تفاصيل ؟
= لا مش فاكر
- و نسيت ؟
= و مكمل من غيرها
- مِرتاح طيب ؟
= تعبان جدا
- تعبان من اية ؟
= من مشاويرها ..
- مشاوير مشاوير ؟
= مشاوير ذِكرى
- مش قولت نسيت ؟
= لِسة فاكرها : )
- الشعر لمين ؟
= ليا و لله
- مش جَرَح الناس ؟
= و جرحني معاه
- طب يجرح ليه ؟
= علشان موزون ؟
- ف بتهرب ليه ؟
= ده ملاذ مضمون
- لو كُسِر الوزن ؟
= القافيه تصون
- الشعر امين ؟
= عمره مابيخون
- طب خانك ليه ؟
= علشان حبيت
- ادمنته ازاي ؟
= من اول بيت
- البيت ادمان ؟
= لو كان بيتها
- انتيكه بقيت ؟
= بل حبيتها
- ماكتبتلهاش !
= بالطبع كتبت
- و كتبت ازاي ؟
= تفريغ لـ الكبت
- صوتك مخنوق ..
= الروح بتضيق
- الجرح صديق ؟
= دة صديق جارح
- فكرت صحيح ؟!
= لسة بفكر
- في الجاي اكيد ..
= لا في امبارح
- مين اقرب ناس ؟
= هاندفريهي
- مينن ابعد ناس ؟
= اصحاب عمري
- كملت السير ؟
= واقف لسه
- طب واقف ليه ؟
= إحتارت ف امري
- اقعد طيب
= مالهوش لازمه
- شكلك تعبان
= ماهي دي الأزمه
- اطلبلك ايه ؟
= قهوه و فيروز ؟؟
- يعني انت عميق ؟
= لا ده انا اراجوز
- اوقات بتفوز ؟
= نادر جدا
- حلو. . و بعدين ؟
= بخسر بالجوز
- امك موجوده ؟
= و ابويا كمان
- راحتك مع مين ؟
= مع صاحبه " كمان "
- راضي بحالك ؟
= بحمد ربي
- قولت المتشال ؟
= لسه مخبي
- فضفض طيب ..
= قدام هحكي
- و الوقت يفوت ؟
= ضيعنا كتير
- تميت عشرين ؟
= كلها ساعتين ..
- عديت سبعين ؟
= من وقت كبير !

بقلم مصطفى ناصر

تميت عشرين

تميت عشرين

للمشاركة انت بحاجه الى تسجيل الدخول او التسجيل

التسجيل

تسجيل الدخول