نجاح أي عمل فني

نجاح أي عمل فني من وجهة نظري مرهون بتحقيقه للهدف إللي إتعمل علشانه ، مش مرهون بوجهات نظر النقاد والرموز والكتب والمراجع . الأغاني بشكل خاص منتج مختلف له زباين كتير لأنه ينفع يكون شغال جنب أي حاجة تانية في نفس الوقت ويشاركك المود . والأغاني بتصطاد زبونها ، على رأي طيب الذكر البهظ بيه .
الأغاني الوطنية مثلاً أغاني هدفها إنك لما تسمعها تحس إن في حاجة جواك بتتحرك ناحية حبك للبلد أو إشتياقك ليها لو إنت غايب عنها . لو الأغنية حققت الهدف ده مع إللي سمعوها وقت نزولها تبقى أغنية حلوة حتى لو كل النقاد قالوا عكس كدة . ولو عاشت وحققت الهدف ده بعد سنين من نزولها تبقى أغنية ناجحة . كذلك الأغاني اللي بتستهدف المجروحين أكيد إللي عملها عملها عشان يفكرهم بجروحهم ويعيشهم في مود هما بيختاروا يعيشوا فيه أوقات بمزاجهم . هي الأغاني دي زبونها كدة آه .
لحد بداية الألفينات كانت أغنية "شيك شاك شوك" هي الراعي الرسمي لأي إحتفال في مصر وكانت بتشتغل عادي لإن في شبه إجماع ضمني على إن دي أغنية "مُتفق عليها" في المناسبات . ونجاح الأغنية دي وقتها كان علشانها بتحقق الهدف منها ، وهو إن الناس ترقص . المهرجانات كمان ناجحة عشانها بتحقق الهدف منها . إن الناس ترقص
بقلم : نبيل عبد الحميد