خليك فى البيت

**Admin** · **Admin** الأحد أبريل 05, 2020 10:02 am

سألت نفسي وأنا المفطور على اننا خلفاء الله ف الأرض ، هل ربنا سلط علينا بذنوبنا جند من جنوده ؟

وهل ظني في الله سبحانه وتعالى انه يريد لنا الشقاء والمرض والموت !!

حاشا لله ، أمال ليه اللي بيحصل ده وبالشكل ده ف ظرف شهرين مليون مصاب وستين الف قتيل !!

واكتشفت ان الڤيروس ده نعمة من ربنا ، فرصه تانية ماكانتش هتجيلنا عشان نعيد حسابنا ،

علشان الدول العظمى تعرف ان مافيش عظيم الا الخالق عز وجل ،

درس لتجار السلاح والمستبدين اللي معملوش حساب شيء لايرى بالعين المجردة

عشان يعرفوا ان الله حق وان النووي والسلاح الكيميائي والصواريخ مش هتحميهم ولا هتضمنلهم الحياة ،

ثغره غير متوقعه في أي خطة اقتصادية ، ضربة لأي بورصه وسياحة ،

شلل تام يضمن للأرض انها تتنفس تاني فتنبت الورود والزرع ويتكاثر السمك ويقل الاحتباس وتختفي العوادم وادخنة المصانع

ويتضخ الاكسچين ، ربنا بيظهر قدرته وبطشه ورحمته ، رحمته اللي رغم كل اللي بيحصل هي لسه ابهى واوضح مايحدث

في المشهد كله تفتكر قبل الڤيروس كانت ايه مشاكلك ومخاوفك ،

بصيت ازاي للانسان او الانسانه اللي كنت بتهين نفسك وبتضيع عمرك عشانه وهو عمره ماحبك !

عرفت ان الفلوس مش هي المشكله والسلطه مش المشكله ولا الجاه ولا النفوذ ؟؟

عرفت ان الشيء الوحيد اللي مالوش تمن هو الصحة والأمان !

بعد الڤيروس كام واحد هيعمل المشروع اللي كان مأجله ،

كام انسان هيصالح عدو وهيبتسم لجار وهيعترف بمشاعر ،

لما تشوف كل الناس بتهرب من بعض عشان العدوى كأنه يوم يفر المرء من أخيه ياترى هتنخدع ف الناس تاني !!

عرفت مين سأل عنك واتطمن عليك وحس بغيابك !!

عرفت حجمك بجد ف عين ناسك اللي بيحبوك وعين اللي عمرهم ماحسوا بوجودك ولا بأهميتك !

حسيت جمال الزرع والبحر والشارع والقهوه والجامعه والسفر والصلاة والمشي والسينما والكافيه والسهر !

شفت انك كنت متغرق ف فيض من النعم ازاي وكنت بتتبتر على كرم ربنا

وحاسس ان الدنيا ضدك عشان خاطر واحد خانِك أو واحدة ماحستش بيك !!

تدبر حكمة ربنا من الڤيروس ده وانت هتعرف انه نعمه منه لصلاح كل حاجه وقول الحمد لله وخليك في البيت .

بقلم : عمرو حسن

للمشاركة انت بحاجه الى تسجيل الدخول او التسجيل