شوية فضفضة بقلم : محمد إبراهيم

من ألطف الحاجات إني لقيت بابا مسجل ماما علي الموبايل " عمري " فإستغربت جداً .. خصوصاً ان بابا مش من الناس اللي بتعرف تعبر عن مشاعرها فسألته ليه " عمري " .. فإتكسف كدة وقالي " إسأل أمك " .. فقالتلي انهم زمان من أكتر من ٣٠ سنة كانوا خارجين سوا و إشترالها حلويات .. كان بيبقي مكتوب علي كل ورقة كلمة .. ولما فتحوا الإتنين سوا لقوا مكتوب علي الورقتين " انت عمري " .. وماما محتفظة بالورقتين دول لحد النهاردة في سلسلة دهب .. إفتكرت وقتها اني مسمى آيه علي الموبايل " بنتي " .. والسبب في الإسم ده برضو ان يوم ما روحنا نجيب الدبل حمايا قالي كلمة واحدة قالي انت واخد " بنتي " أغلي حاجة عندي .. قولتله وهتكون بنتي بإذن الله .. ومن يومها و انا مسجلها علي الموبايل بنتي .

حاجات بسيطة .. بس فيها ونس ودفا و ذكريات الواحد حقيقي عايش عليها وكل ما يفتكرها يبتسم ويحس بحلاوة الدنيا

مسجلين بعض إيه إنتوا كمان ؟!

بقلم : محمد إبراهيم