متكابرش

**Admin** · **Admin** الأحد أغسطس 16, 2020 12:30 pm

في ناس ممكن تزعل مني بسبب الكلمتين دول .. بس هقولهم وزي ماتيجي .

- صاحب بنات وإضحك عليهم !

بس متقولش إنه مش حرام ! لان ربنا بيقول : ولا متخذات أخدان

مينفعش واحد يرافق واحده من غير رابط شرعي !

- إشرب خمرة .. لكن متحللهاش وتعتبرها عادي.

لان ربنا علمنا إن الخمر جريمة بشعة ، من عمل الشيطان .

- بتزعق لابوك وأمك .. عاوز تكمل في اللي بتعمله إنت حر ..

لكن متعتبرش إنه حقك .. لأن عقوق الوالدين حتي ولو كفار له عواقب شديدة

زي إنه ربنا يوم القيامة مبيكلمش العاق ، ولا بيبصله ، وبيدخله النار من غير حتي ما يحاسبه !

= بإختصار .. لو بتعمل كل ذنوب الدنيا .. في ذنب إوعي تعمله ،

وهو : إنك متقولش عليها مش ذنوب ، وإن كل الناس كده !

لأنك ساعتها هتكون كافر بالله .. ربنا بيقول : أفتؤمنون ببعض الكتاب وتكفرون ببعض؟!

ربك بيتعجب من تصرفات الناس اللي بتحلل الحرام لنفسها وبيعتبرهم كُفار !

لأن الدين حتة واحده لإما تاخده كله علي بعضه لإما تسيبه ومتعتبرش نفسك مسلم

إعترف إنك مقصر .. إعترف إن اللي إنت عملته وبتعمله مالوش مبرر .. ساعتها هتخرج من دايرة الكفر لدايرة التقصير،

وربنا بيقول : وآخرون إعترفوا بذنوبهم .. يعني مكابروش وعملوا زي إبليس اللي إتطرد من رحمة الله بسبب الكِبر والعنجهية متقاوحش في الثوابت اللي ميختلفش عليها مؤمن ..

إستغفر بإستمرار وإحشر مع ذنوبك حسنات بحيث حسناتك تغلب سيئاتك وربنا وقتها يهديك .. وإوعي ياصديقي تتعامل مع الدين بالمزاج ، وكأنك بتنقي خضار تاخد اللي هواك وتسيب اللي ميعجبكش !

أكذب عليك لو قولتلك إني مش مهمل ومليان بلاوي، وكلنا كده .. بس لما بعمل ذنوب بقول إنها ذنوب ،

ومبقولش علي المِش عسل ! بدعي ربنا يتوبني عنها، ومببررش الغلط لنفسي ..

لأن الإعتراف بالذنب يعتبر نصف التوبة .

- ليس الخطأ عيبًا ، ولكن العيب هو الرضا به والاستمرار عليه ، والدفاع عنه .

بقلم : أحمد أيمن

متكابرش

متكابرش

للمشاركة انت بحاجه الى تسجيل الدخول او التسجيل

التسجيل

تسجيل الدخول