أنا معجب بيكى

متخيل نفسك تدخل تقولي انا معجب بيكي
بدون سابق معرفه 
وبدون سابق كلام أو حتي لقاء
مجرد انك شوفت صوري اللي انا عايزه الناس تشوفها من غير عيوب بشره اللي انا شيلاها و من الزاويه اللي انا حباها تبان عشان شكلي حلو منها و برياكشن وش مصطنع عشان بيبين ملامحي
يعني تخيل انك معجب بالصوره اللي انا مكوناهالك عني 
لا بقي شوفت عصبيه ولا زعيق ولا شتيمه ولا غضب من اتفه الأسباب ، لا شوفتني وانا بضحك بهستريا علي حاجه تافهه ولا وانا ببتسم بحب لملامح حد بحبه ، لا شوفتني وانا باكل وانا جعانه ولا شوفتني في نهاية يوم متعب في الكليه و المواصلات أو الشغل ، ولا شوفتني وانا مكسوفه و وشي بيدي الوان و عيني بتطوف المكان كله عشان تداري الكسوف دا
مشوفتش تعابير وشي لما بتفاجئ و نبرة صوتي لما بتبسط و تلقائيتي لما بعمل حاجه بحبها
مسمعتش كلامي في موضوع سياسي بحت أو رايي في الحقوق النسويه ، أو حتي رايي في زيادة مدة عرض سبونج بوب من نص ساعه لساعه
متعرفش عن مزيكتي اللي بسمعها عشان تعدل مزاجي و اللي بسمعها عشان تحافظ علي روقاني
انا شايفه انك عشان تعجب بيا لازم تمر معايا بكل المواقف الممكنة و تسمع كلامي في كل المواضيع المهمه و التافهه 
و عايزني لما تدخل تقولي انا معجب بيكي وانت متعرفنيش اصلا أرحب بيك؟